ಹೆಣ್ಣು ಎಂಬ ಹೊನ್ನು ನೀನು
ಸೃಷ್ಟಿ ಮೂಲಕೆ ಒಡತಿ ನೀನು
ಹಸಿರ ಸಿರಿಗು ಉಸಿರು ನೀಡೋ
ಬಾಳ ಬಂಡಿಯ ಗಾಲಿ ನೀನು

ಶಾಂತ ಮೂರ್ತಿ ಪ್ರೀತಿಗರಸಿ
ನಗುವೇ ನಿನ್ನ ಒಡವೆಯೂ
ಶೌರ್ಯದಲ್ಲಿ ವೀರ ವನಿತೆ
ಧೈರ್ಯದಿಂದೆ ನಡೆಯಲು

ಚಿತ್ತದಲ್ಲಿ ಬುದ್ಧಿಯು
ಅಂತರಂಗ ಶುದ್ಧಿಯು
ಕೆಲಸವೇನೆ ಇದ್ದರೂ
ಇಲ್ಲ ನಿನಗೆ ಸಾಟಿಯೂ

ಅಬಲೆಗಿಲ್ಲಿ ರಕ್ಷೆಯಿದೆ
ತುತ್ತು ನೀಡೋ ಮನಸು ಇದೆ
ಜಗದ ಜನರ ಕಣ್ಣು ತೆರೆಸೋ
ಸಾಮರ್ಥ್ಯವು ನಿನಗಿದೇ

ಗಿರಿ ಶೃಂಗದ ಮೇಲೆಯೂ
ನಭಕೆ ಹಾರೋ ವೇಳೆಯೂ
ನೀರ ಮೇಲೆಯೂ ಸಾಗೋ
ಶಿಸ್ತಿನಾ ಸಿಪಾಯಿಯೂ

ಬತ್ತದಿರಲಿ ಪ್ರೀತಿ ಗಂಗೆ
ನಿನ್ನ ಜೀವ ಸೆಲೆಯಲೀ
ನಾಡು ಪ್ರಗತಿ ಕಾಣಲಿ
ನಿನ್ನ ರಕ್ಷೆ ಗೂಡಲಿ

ಬೆಲೆಯ ಕಟ್ಟಲಾದಿತೇ
ನಿನ್ನ ಕೆಲಸ ಕಾರ್ಯಕೇ
ನಿನ್ನ ನಂಬಿ ಬರುವವರಿಗೆ
ನೀನೆ ಅಭಿಸಾರಿಕೆ

ಸಾಧನೆಯ ಹಾದಿಯಲ್ಲಿ
ಹೆಜ್ಜೆ ಗುರುತು ನಿನ್ನದೇ
ಪ್ರಶಸ್ತಿ ಇರಲಿ ಇಲ್ಲದಿರಲಿ
ನಮ್ಮ ನಮನ ನಿನಗಿದೆ .