ತಂಪು ಗಾಳಿ ಹೊತ್ತು ತಂತು ನಗುವಿನಾಭರಣ ...
ಹನಿ ಹನಿಗಳ ಪೋಣಿಸಿ .. ಹಸಿರ ನಡುವೆ ಸೇರಿಸಿ
ಭೂಮಿ ತಾಯ ತನುವನ್ನೆಲ್ಲ
ಬಿಟ್ಟು ಬಿಡದೆ ಸಿಂಗರಿಸಿ !
ಭಾವಗಳಿಗೆ ಸಿಂಚನ ಬಾನು ಭುವಿಯ ಸಮ್ಮಿಲನ !
ಹಾರುವ ಹಕ್ಕಿಗಳ ರೆಕ್ಕೆಗಳಲಿ
ಹಸಿರ ಎಲೆಗಳ ಚಿಗುರಿನಲ್ಲಿ
ಹರಿವ ನೀರ ಸದ್ದಿನಲ್ಲಿ
ಏನೋ ಒಂದು ಹೊಸತನ
ಆಹಾ ಎಂಥ ರೋಮಾಂಚನ !
ಓಡುತಿರುವ ಮೋಡಗಳಿಗೂ
ಕಂಪ ಸೂಸೋ ಹೂವುಗಳಿಗೂ
ಹಪಹಪಿಸುವ ಹೃದಯಗಳಿಗೂ
ಸಿಗುವುದೀಗ ಭರವಸೆ
ಇಳೆಯ ಪ್ರೀತಿ ಮುಂದೆ ಸೋಲೋ
ಬಾನು ನೀಡೋ ಭರವಸೆ !
